/image%2F0568858%2F20140111%2Fob_0348f4_logo-pno-jpg){kind=logo}
Cal abolir las termièras ?
Dins lo n° 128 d’abriu-mai de 2013 de la colleccion « Manière de voir » lo Monde Diplomatique s’enquestiona « Cal abolir las termièras ? »
Al dintre de l’occitanisme politic, lo Partit de la Nacion Occitana es lo sol d’afortir clarament qu’es per la creacion d’una republica federala occitana, sobeirana e sòcia tant de l’Union Europenca coma de l’ONU.
Pels nacionalistas occitans la sobeiranetat implica l’existéncia futura d’un estat occitan.
Per que ? Pr’amor que :
- A malgrat l’avançada que representa le seu estatut, la Val d’Aran es pas sobeirana. Es sonca autonòma dins la Generalitat de Catalonha e dins l’estat espanhòl.
- Se las valadas occitanas de l’estat italian pòdon beneficiar de pichonas mesuras a favor de la lenga e de la cultura occitanas, grand mercés a una lèi tocant las minoritats linguisticas votada pel parlament de la republica italiana, aquelas d’aqui son pas sobeiranas e dependon de Turin e de Roma.
- Quitament se las regions occitanas de l’estat francés se federavan d’un biais o d’un autre, serían pas qu’autonòmas dins l’encastre de la republica francesa.
La sobeiranetat aquò vòl dire un estat occitan desseparat administrativement e politicament de França, d’Itàlia e d’Espanha mas tanben de Catalonha e d’Euscàdi per parlar de totes los nòstres vesins.
La bastison de l’Union Europenca abaissèt las termièras, mas las aboliguèt pas e las abolirà pas jamai.
Per una nacion, doncas per un pòble, las termièras d’un estat marcan los confins territorials de l’accion que pòt e que vòl menar lo seu govèrn.
Per un estat federal occitan la re-occitanizacion linguistica sería una prioritat.
Lo govèrn d’un estat federal Occitan causiría las infraestructuras que li fan vertadièrament mestièr per que l’economia de totas las regions del país fonccione.
Lo govèrn d’un estat federal Occitan faría de causidas economicas e socialas per assegurar lo ben estar de tot lo pòble occitan.
Lo govèrn d’un estat federal Occitan defendría los interesses occitans a la taula comuna d’Euròpa de Brusselas.
Se i a de termièras que cal abolir son las que nos son estadas impausadas pels 3 estats – França, Itàlia, Espanha – que nos colonizèron e que nos tènon encara.
L’11 de setembre de 2012, a Barcelona, lo PNO e d’autres occitanistas èran cotria damb lo pòble catalan per respondre a la question responsa seguènta « Que vol aquesta gent ? Un estat independent ! »
Çò que voliam per Catalonha o volèm e o voldrem tanben per Occitània. Las cadenas son fachas per èsser copadas …
Gèli Grande
