Overblog Suivre ce blog
Editer l'article Administration Créer mon blog

Cap a l’autonomia economica e financièra de las regions occitanas coma estapa sul camin de l’independéncia d’Occitània

le PNO à VilanòvaA prepaus de la participacion financièra demandada a las collectivitats localas (regions e departaments)per la construccion d’una linha novèla de granda velocitat entre Bordèu e Tolosa, Alain Rousset (PS), President del Conselh Regional d’Aquitània, apostrofèt lo govèrn. Li demanda de prene en compte la situacion financièra dificila dels departaments e de las regions concernits per aquel projècte que manca pas d’èstre contestat. Pels elegits locals la tòca es de desenclavar las regions Aquitània e Miègjorn-Pirenèus en las fasent accessiblas mai rapidament dempuèi París mas pel Partit de la Nacion Occitana, impòrta d’arrestar d’èstre obnubilat per París. L’enjòc vertadièr es de desenclavar una partida d’Occitània sus l’axe Bordèu-Niça en perlongant la LGV cap a Montpelhièr, Marselha e Niça e en la religant Barcelona e a las autras regions europèas vesinas. Aquò se pòt pas far dins lo sol interès de las metropòlis occitanas nimai deu pas daissar de caire las vilas mejanas, lo centre e lo Nòrd d’Occitània. Luènh de far sonca de LGV, fa mestièr de modernizar las linhas existentas per lor permetre d’absorbir lo creis del trafec viatjaires e de desvolopar lo  ferrotatge.

M. Rousset a rason de ligar aquel projècte e l’amanaitjament del territòri a la reforma de las finanças localas. Coma François Hollande, preconiza de balhar un pauc d’autonomia financièra a las collectivitats territorialas e de contunhar la descentralizacion. Lo Partit de la Nacion Occitana pensa que cal anar fòrça mai luènh. Avèm besonh de regions gaudissent d’una autonomia vertadièra sul plan economic e fiscal, subretot del poder de levar l’impòst sus plaça e de ne balhar una part negociada al poder central. Dins l’encaste de l’ora d’ara caracterizat per lo desengatjament financièr de l’Estat central, l’autonomia financièra e fiscala risca de consistir principalament a gerir una dotacion de l’Estat en baissa. L’exemple del dinamisme economic d’Alemanha mòstra que una autonomia vertadièra pòt pas marchar que dins un encastre federal e non pas dins un encastre ipercentralizat coma lo de França. Lo Partit de la Nacion Occitana se ditz per l’autonomia de las regions occitanas dins un encastre federal francés e europèu coma estapa sul camin de la creacion d’una Republica federala occitana independenta.

17 de febrièr de 2012
Partit de la Nacion Occitana
10 carrièra de Romàs
F – 47000 Agen (Occitània)

+33 6 76 47 32 12
joan.peire.alari@gmail.com
http://www.p-n-o.org

 

 

Tag(s) : #COMUNICAT( Oc )