Overblog Suivre ce blog
Editer l'article Administration Créer mon blog

Comunicat :

PNO Montalban 2010Lo Partit de la Nacion Occitana tenguèt son Conselh Nacional biannal los 6 e 7 de novembre de 2010 a Montalban (Tarn e Garona).

Los militants de maitas regions d’Occitània èran presents tanplan coma los sòcis d’onor catalans venguts especialament de Barcelona. Lo Partit de la Nacion Occitana existís dempuèi 50 ans.

Perqué parlar de nacion per Occitània ? Pr’amor son fondador, Francés Fontan, pensava que l’existéncia d’una lenga determina l’existéncia d’una nacion. I a una lenga occitana, dins sa varietat dialectala, donc i a una nacion occitana.

Per consequent, França es un Estat plurinacional compausat de las nacions francesa, bretona, basca, catalana, occitana, còrsa, neerlandesa (Flandes) e alemanda (Alsàcia e Lorena tiesa).

Mas se la lenga occitana es reconeguda dempuèi la lei Deixonne de 1951 e fa partida del patrimòni de França tal coma lo reconeis ara la Constitucion francesa, Occitània que comprend lo terç Sud de l’Estat francés, lo Val d’Aran de l’Estat espanhòl e las valadas alpinas occitanas del Piémont en Itàlia, a pas cap de reconeissença oficiala dins la Republica francesa.

Per contra, lo Val d’Aran gausís d’un estatut d’autonomia dins lo sen de la Generalitat de Catalonha enclusa dins l’Estat espanhòl e l’occitan i es lenga co-oficiala amb l’espanhòl e lo catalan.

PNO Montalban 2010Lo Partit de la Nacion Occitana a per tòca l’emancipacion de la nacion occitana per etapas. La primièra etapa passarà par un renfortiment considerable dels poders de las regions occitanas en França. Devon en particular aver lo poder de levar l’impòst coma lors vesinas en Espanha e de se regropar per trabalhar amassa e abandonar las rivalitats damatjosas que fan lo jòc del centralisme parisenc (per exemple Bordèu e Tolosa). Puèi que una reforma territoriala es en projècte en França, lo Partit de la Nacion Occitana se ditz per la supression dels departaments, lor remplaçament per los países istorics e la creacion de collectivitats novèlas per los catalans dels Pirenèus orientals e los bascs dels Pirenèus atlantics.

La segonda etapa passarà per l’autonomia interna de l’Occitània « francesa » dins l’encastre d’una Republica francesa federala.

La tresena etapa, a tèrme long, que pòt pareisser una utopia mas que es del tot realizabla, serà la reunificacion d’Occitània, escartairada entre Espanha, França e Itàlia, e la creacion d’una Republica federala occitana donc d’un Estat occitan, membre de l’Union europèa e de l’ONU.

Nos inscrivèm donc dins aquel grand corrent d’emancipacion en Euròpa e anam cotria amb los bascs, los catalans, los escoceses e los flamencs de Belgica.

Aquelas tòcas, segon lo Partit de la Nacion Occitana, poiràn sonca èsser agandidas per de vias democraticas e pacificas, çò que implica per sos militants de se presentar tan sovent coma possible a las eleccions, sols o preferentament en aliança amb d’autras fòrças occitanas independentas dels partits politics franceses de tal biais que conquisten lo poder dins las regions occitanas.

PNO Montalban 2010Pel moment, lo Partit de la Nacion Occitana recomanda a las regions occitanas d’engimbrar de politicas lingüisticas ausardas en favor de l’occitan e per sosténer e promòure l’economia de nòstras regions. Sosten las classas bilingüas de l’Educacion Nacionala e l’ensenhament de l’occitan per immersion dins las escòlas dichas « calandretas » que devon èsser integradas dins lo servici public de l’Educacion Nacionala.

Coma lo govèrn actual sembla pas decidit a téner sa promessa facha dos ans fa de far votar pel parlament una lei sus las lengas regionalas, lo Partit de la Nacion Occitana sosten los esfòrces dels parlamentaris de totas tendéncias qu’ensajan de sometre al burèu de l’Amassada Nacionala un projècte de lei sus las lengas regionalas.

Lo Partit de la Nacion Occitana saluda l’iniciativa del Parlament catalan de Barcelona que rendèt l’occitan aranés oficial dins tota la Catalonha mas denoncia las manòbras de las fòrças centralistas de Madrid, en particular lo Tribunal constitucional espanhòl que remèt en causa d’aspèctes fondamentals del novèl estatut d’autonomia votat pel Parlament de Barcelona e que indirectament amenaça çò acquesit pel Val d’Aran.

Lo Partit de la Nacion Occitana se regaudís del passa carrièra gigant de Barcelona en julhet passat per l’auto-determinacion de Catalonha tanplan coma de la capitada de las consultas popularas organizadas dins las comunas catalanas que mostrèron que los catalans vòlon en massa l’independéncia.

Çò que lo Partit de la Nacion Occitana desira per Occitània e Catalonha, o desira tanben per totas las nacions sens Estat del monde.

Partit de la Nacion Occitana Lo 8 de novembre de 2010

Felip Bonnet, capiscòl

F - 31440 Marignac (Occitània) +33 6 81 37 81 14

philippe.bonnet89@wanadoo.fr

Tag(s) : #COMUNICAT( Oc )