Overblog Suivre ce blog
Editer l'article Administration Créer mon blog

Bona Annada.

Occitanas, occitans e autras pobladas del vilatge Monde, per 2013 vos desiri una annada de 12 meses que seràn de 28, 30 o 31 jorns, de setmanas de 7 jorns, de jorns de 24 oras, d’oras de 60 minutas e de minutas de 60 segondas que passaràn melhor en tot legir Jornalet, La Setmana, Lo Lugarn e lo demai de la bona prensa occitanista.

A ! fasètz la bèba e un morre de tres pams per que vos desiri quicòm qu’avètz jà !

Es atal, sèm tornar mai embarcats dins una farandola de 365 jorns. S’avèm pas encara ongan l’independéncia de la nòstra nacion occitana, servarem al mens l’independéncia d’esperit. D’unes l’an pas mai pr’amor que i an agut renonciat mai o mens volontariament e/o ne vòlon pas mai gausir.

Per totes aqueles que s‘an perdut l’esperança e lo sòmi, desiri que l’annada aquesta siaga de las plan marridas per l’imperialisme francés tant en Occitània coma endacòm mai e desiri la medisha causa per totes los imperialismes sus aquesta tèrra.

Un amic me precisa « te cal pas oblidar lo capitalisme ultra mondialista que meti dins la medisha saca ». Vertat es que d’aquesta passa va cotria damb mai que d’un imperialisme. Çaquelà, amic meu es oblidar un pauc lèu que del temps de la « lumenosa bastison del socialisme » que devía menar la claça obrièra mondiala al paradis sens claça e sens estat (entre 1945 e 1991) es lo socialisme que se faguèt èl tanben lo vector de l’imperialisme (Russia, China etc …)

Un còp èra quand lo quite capitalisme existissía pas encara (Empèri Roman, Empèri Incà etc) los imperialismes s’adobèron tostemps de tot çò que los i fasía ventre per senhorejar los pòbles e los sagnar se o calía.

E çò que podèm diser del passat, me pensi malurosament que lo podrem diser tanben dins l’avenidor. L’Òme es un lop per l’Òme e los pòbles momentanèament potènts son de lops pels pòbles pichons o momentanèament flacs.

Demòri d’a fons Etnista valent a dire inter-nacionalista coma me o ensenhèt En Francés Fontan, mas d’illusions n’ai pas mai.

Cada an per Ròsh ha Shanà (lo Novèl An josiu) los ebrius d’a passat temps d’avant lo restabliment de l’Estat d’Israel disían ritualament :

« L’an que vèn a Jerusalem ! »

Quand èri faidit en França, al moment del ressopet de Sant Salvestre, davant tota la taulada familhala portavi un brinde personal dels plan simples :

« L’an que vèn al País »

Mandi una idèa. Nosaus que sèm per una Occitània Federala e Democratica per que pas popularizar aqueste eslogan :

« L’an que vèn a-s-Albi* per l’independénci ! »

Gèli GRANDE

Cap d’An de 2013

*Podètz remplaçar Albi per una autra vila, vilòta o vilatjon d’Occtània de la vòstra causida

Tag(s) : #Tribune libre