Overblog Suivre ce blog
Editer l'article Administration Créer mon blog


PNO : Comunicat
 
Descentralizacion : una reforma plan pauc radicala
 
François Hollande ven de far de proposicions per la reforma de la descentralizacion que farà l’objècte d’un projècte de lei presentat al Senat a la debuta de l’an que ven.
 
De segur, las regions seràn encargadas de l’emplec, de la formacion, del sosten a las PME e de la gestion dels fons estructurals europèus mas la politica sociala demòra la prerogativa dels departaments, escalon administratiu inutil que lo Partit de la Nacion Occitana  prepausa dempuèi longtemps de suprimir.
 
La transicion energetica seriá partejada entre l’Estat e las comunautats de comunas dins l’abséncia non justificada de las regions.
 
La reconeissença per las collectivitats territorialas d’un poder, emai foguèsse limitat, d’adaptacion de la lei es un cambiament positiu mas seriá encara melhor qu’aguèssen un poder legislatiu vertadièr, valent a dire lo poder de prepausar e de votar de leis.
 
Tocant la reforma fiscala, es vertat qu’es previst una part d’autonomia per aquelas collectivitats sens dessarrar çaquelà lo contraròtle de l’Estat central. Lo Partit de la Nacion Occitana vòl, per quant a el, que las regions leven los impòsts en çò sieu coma al País Basc autonòme de l’Estat espanhòl e ne reversen una part negociada a l’Estat central.
 
Lo Partit de la Nacion Occitana , de mai, regreta que lo cap de l’Estat aja pas engainat la question de la democracia lingüistica en França qu’es ligada a la descentralizacion. Sufirà pas que França ratifique la Carta europèa de las lengas regionalas e minoritàrias. Las regions dont las lengas d’origina son diferentas del francés devon aver mai de competéncias dins lo domèni de la lenga, de la cultura (edicion, espectacles, difusion e medias) e de l’educacion. Poiràn sonca menar de politicas lingüisticas ausardas per la promocion de lors lengas dins la mesura que inflüiràn sul contengut de l’ensenhament e introdüiràn lo bilingüisme generalizat, coma en Corsèga, tanplan coma l’ensenhament en lenga regionala.
 
Aquò se deu far pel biais d’una cooperacion estrecha entre regions ambe la meteissa lenga. Ja s’entend que aquela cooperacion se pòt pas limitar a las questions lingüisticas e culturalas. Poiriá desbocar sus un regropament de regions sens exclaure los redecopatges d’unas regions per crear per exemple una region catalana en Rosselhon, una region basca dins los Pirenèus atlantics e d’institucions transfrontalièras aquí ont son justificadas per la proximitat lingüistica e culturala.
 
Sens voler far cap de procès d’intencion, mentre qu’una lei serà pas votada, es clar pel Partit de la Nacion Occitana que las proposicions de François Hollande mèton gaire en causa lo modèl jacobin francés, plan alunhat de las autonomias e del federalisme d’unes de nòstres vesins europèus.
Serem atentius quand lo projècte de lei serà estudiat pel Senat.
 
24 d’octòbre de 2012
 
Partit de la Nacion Occitana
10 carrièra de Romàs
 F – 47000 Agen (Occitània)
 +33 6 76 47 32 12
 
joan.peire.alari@gmail.com
http://lo.lugarn-pno.over-blog.org/
http://www.p-n-o.org

Tag(s) : #COMUNICAT( Oc )