Overblog Suivre ce blog
Editer l'article Administration Créer mon blog

Cal cremar de bandièras francimandas ?


Joan-Pèire Alari Cal felicitar l’òme que cremèt doas bandièras francesas lo 11 de novembre passat a Foish ? Francament cresi pas. Solide, Occitània es una nacion colonizada per França. Foish es en Occitània. Aquela bandièra tricolòra es pas la nòstra, es la d’una nacion imperialista. Nimai la Granda Guèrra que se ne celèbra l’armistici lo 11 de novembre foguèt pas la nòstra e nòstres aujòls paguèron bravament e inutilament lo prètz del sang. Tota una generacion d’occitans foguèt decimada. Compreni a 100 del cent la frustracion dels rares Occitans que s’acontentan pas d’afortir lor identitat occitana mas voldrián qu’Occitània foguèsse liura. Imagini qu’aquel òme a pensat que lo melhor mejan de far lo buzz coma se ditz ara èra de far quicòm d’espectaclós coma cremar publicament de bandièras francimandas. Solament podèm dobtar de l’eficacitat d’aquel acte dins l’opinion publica occitana. Vos foti mon bilhet que o ben lo monde comprendràn pas e lo prendràn per un caluc o ben dins una subredicha de chovinisme francimand lo condemnaràn e seràn contents se va en preson. Cremar una bandièra, tròç de teissut nautament simbolic, es una causa sensibla. O vegèrem qualque temps fa quand de joves maugrebins cremèron una bandièra francesa a Tolosa. Es perilhós de jogar ambe los simbòls. Naturalament que çò que faguèt aquel òme es pas un crimi a mon avejaire mas serà probable considerat coma delicte d’escòrna al drapèu de la Republica. Farà de publicitat per Occitània ? Benlèu ben mas serà una arma de doble talh. La consciéncia nacionala occitana es encara febla. Sèm pas en Catalonha, s’en manca e d’alhors ailà creman pas la bandièra espanhòla la siblan.

Es un acte isolat. Seriá estat mai productiu e pedagogic de far, en defòra de la ceremonia oficiala, un depaus de garbas per rendre omenatge a los que moriguèron per res, per una patria qu’èra pas la lor e de metre de bandièras occitanas. Segur, volèm pas qu’aquel òme angue en preson. Podèm demandar a la justícia d’èstre clementa mas lo podèm pas lausenjar tanpauc. Nòstre trabalh de militants politics occitans independentistas es pas de nos far plaser en cremar de bandièras o en far petar de bombas. Es de far comprene als occitans que son pas franceses e que la sola solucion per salvar nòstra lenga e nòstra nacion es l’independéncia de França. Es un trabalh de cada jorn e es mens gratificant que de cremar de bandièras. Pasmens es lo sol possible.

Joan-Pèire Alari

Tag(s) : #Tribune libre