Overblog
Editer l'article Suivre ce blog Administration + Créer mon blog

Los eurodeputats se chautan de la democracia coma d’una figa

            A còps, val lo còp de s’anar passejar « sus la tèla ». Devi dire qu’es pas mon ocupacion favorita, mas me pòt arribar d’i anar cercar qualques entresenhas tocant tal sicut o tal autre. Atal, en virant las paginas (virtualas plan solide) m’arriba de tombar sus de causas que poirián passar per anodinas, mas que nos ensenhan fòrça sus l’esperit de nòstres politicians. Atal, per la prima, 29 eurodeputats mandèron un corrièr al Primièr ministre espanhòl per denonciar l’arbitrari de la Cort Suprèma de son reialme (la meteissa cort que ven de destituïr lo President catalan Quim Torra coma s’èra un simple foncionari d’Espanha). Me sembla que seriá la mendre de las causas qu’en democracia los representants dels pòbles europèus se preocupèsson de l’equitat de la justícia sul continent. D’ont mai quand se tracha pas per eles que de signar una brava pichona letra remembrant just que lo Naut-Comissari de las Nacions Unidas pels dreches umans a, a mantunas represas, demandat la liberacion dels prisonièrs politics catalans.

            Aquela letra, que fa pas que dire los principis bèls de la democracia quand aquela es pas desaviada per d’ideologias imperialistas, es estada signada pas que per 29 eurodeputats mentre que lo Parlament ne compta 705 (aprèp la sortida de Grand-Bretanha). Supausi que los iniciators d’aquela accion an degut presentar lor intervencion a totes los eurodeputats, en defòra benlèu de los que son marcats dins lo grop d’extrèma drecha. A n’aquel prepaus dobrissi una parentèsi per dire que se la letra es pas estada presentada als eurodeputats d’extrèma drecha es una error politica màger. Lor refús de la signar auriá portat una pròva suplementària de lor asirança per la democracia e lor sosten als imperialismes.

            En agachant la tièra dels signataris me maini que i a, condreitament, los dos eurodeputats d’Esquerra Republicana de Catalonha que sèson dins lo grop dels Verts-Aliança Liura Europèa. Me pensèri -non sens dobtança- que Los Verts, se disent favorables a l’autodeterminacion dels pòbles quand aquò los arrenga, devián aver totes, e dins un meteis movement, signat aquela letra. Oblidessem pas que qualques eurodeputats independentistas son dins aquel grope parlamentari. Alavetz, soi anat véser sul site del Parlament europèu per me mainar que lo grop Verts-ALE compta 68 sòcis e que sonque 20 an signat la letra de protèsta al Primièr ministre espanhòl. Que n’es dels 48 qu’an pas signat ? Èran en vacanças quand l’accion lor foguèt somesa ? Sabèm totes qu’es pas possible e que dispausan de prones estacats parlamentaris per èsser pas estat al corrent. Lo quite Yannick Jadot, la cocolucha dels mèdias francimands e parisencs, a pas signat. Problabament qu’èra en virada dins qualques estúdios de television quand la letra passèt. Soi plan obligat de me rendre a l’evidéncia : la granda majoritat dels sòcis que forman lo grop al qual aparten l’Aliança Liura Europèa se chauta de la libertat dels pòbles, e doncas, per tant, de la libertat individuala dels ciutadans a viure lor pròpria identitat. Seriái curiós de saber çò que ne pensan Diana Riba e Oriol Junqueras los dos eurodeputats d’ERC que son dins aquel quiti grop ?

            Los autres aurodeputats catalans independentistas qu’an signat, valent a dire Clara Ponsatí, Carles Puigdemont e Toni Comín son eles dins lo grop dels non-inscriches. Un grop forra-borra qu’el tanben sembla gaire preocupat per la liberacion dels pòbles dins l’Union. L’alargament intèrne, valent a dire la creacion d’Estats nòus dins la confederacion sembla pas per eles èsser una nocion familiara. Pas mai que per totes los autres grops del Parlament europèu.

            Qualques autres eurodeputats d’autres gropes an signat, mas tornèm o dire son pas que 29 de 705 que semblan se trachar de la bona santat de la democracia dins l’Union tre que se tracha de l’avenidor d’una nacion en passa de liberacion. Alara que lo Parlament europèu es de longa a balhar, non sens rason, de leiçons de democracia a China, Russia, Bielorussia, Turquia, etc… de politicians catalans, elegits democraticament en 2015 per organizar un referendum d’independéncia en 2017, son perseguits e empresonats. Mas aquò los sembla pas esmòure gaire. Dins aquel cas cossí la democracia europèa poiriá èsser fisabla a l’agach del monde entièr s’es pas ela capabla de balhar l’exemple ? Cossí poiriá convéncer del drech inprescriptible dels pòbles a dispausar de lor independéncia s’ela contunha d’entreténer de situacions de colonialisme dins son sen ?

            La democracia es en perilh pertot dins lo monde. Sola Euròpa, de mercés a son istòria podiá demorar un far alucat, esclairant las tenèbras dels autoritarismes que rosegan a l’ora d’ara la planeta. Aquela simpla letra al Primièr ministre espanhòl e lo nombre derisòri de sos signataris fa la demonstracion que las valors umanistas d’Euròpa existisson pas mai, o son plan demesidas. Euròpa foguèt la granda esperança per de milions e de milions de personas sul continent vièlh. Foguèt un projècte grand de democracia e d’abondància pel continent. Malurosament la governança de l’Union fonciona pas mai que coma una grand maquina burocratica sens anma al servici dels Estats e de qualques interèsses financièrs. Pr’aquò cada europèa, cada europèu deu saber que l’Union serà la de totes sos pòbles liures, o serà pas. Pòt pas demorar de temps l’addicion d’egoïsmes estatals. Quin interés pels Escoceses, Bascs, Catalans, Bretons de cambiar de mèstre ? E per nosaus Occitans que nos pòt far que nòstre jaulièr pòrte una casqueta tricolòra o estelada ? En sostenent pas sas nacions que luchan democraticament per lor Estat, l’Union Europèa se copa de sos ciutadans. L’U. E. es malauta. Es malauta de son iniquitat. Son refús de l’independéncia catalana democraticament obtenguda ne fa la demonstracion. Un airal ont lo vòte democratic es pas mai reconegut, a pas mai de valor e ont la polícia englanda las urnas e bastoneja los ciutadans, es un airal que se faissisa. La situacion es grèva.

Sèrgi Viaule

eurodeputats

eurodeputats

Tag(s) : #Tot en Oc, #Tribune libre, #Sèrgi-Viaule, #catalogne, #international

Partager cet article

Repost0
Pour être informé des derniers articles, inscrivez vous :