Overblog
Editer l'article Suivre ce blog Administration + Créer mon blog

Falsa transparéncia al Conselh Regional centroccitan

            Fa gaire de temps foguèri dins l’obligacion d’anar quèrre una entresenha sul site Internet del Conselh Regional de Centroccitània. Camin fasent me retrobèri sus l’annuari fotografic dels elegits. De notar que de las quatre regions administrativas francesas concernidas per Occitània : Auvernha-Ròse-Alps ; Provença ; Aquitània e Centroccitània, aquesta darrièra es la sola que permet un accès aisit a la tièra dels elegits. Son site es plan melhor alestit que lo de las autras regions. Almens d’aquel punt de vista se pòt dire qu’es la mai « transparenta ». A lo consir d’una bona comunicacion e d’aquò li sèm deveires. Mas, coma o anam véser, i a transparéncia e transparéncia. Se cal pas daissar enganar per las aparéncias.

            Mentretant, causa coneguda siá, lo Conselh Regional de Centroccitània es lo sol que se siá impausat de publicar per cadun de sos elegits sa declaracion de patrimòni. D’efièch, se dempuèi la lei del 11 d’octobre de 2013 relativa a la tranparéncia publica, los parlamentaris, los deputats europèus, los presidents e conselhièrs encargats d’una delegacion dels Conselhs Regionals e Departamentals, mai los conses de las agglomeracions de mai de 100 000 estatjants, son dins l’obligacion d’establir una declaracion de patrimòni alprèp del president de la Nauta Autoritat per la tranparéncia de la vida publica ; los simples Conselhièrs regionals son pas tenguts d’o far. Los Conselhièrs Regionals de Centroccitània, dins un eslanç democratic meritòri se son impausats de redigir aquela mena de declaracion. Çò pus extraordinari es que totes los gropes an jogat lo jòc e quitament, anatz saber perqué e cossí ? lo del Rassemblement National.

            Non solament los conselhièrs l’an establida, mas l’an tanben publicada sul site net del Conselh Regional alara que la lei o impausa pas a degun. Normalament solas las declaracions dels parlementaris estatals son consultablas pels electors inscriches sus las listas electoralas dins las prefecturas dels departaments de l’elegit concernit.

            Aquela decision de transparéncia es tras que lausabla. Saludi la volontat d’aquestes elegits d’aver lo consir de se prestar al contraròtle popular. Lor onestetat es de notar dins un monde politic ont abans las constrenchas impausadas per la lei del 10 d’octobre de 2013, lo secret dels revenguts èra la règla dins lo monde politic. Un secret que lisava sovent cap a la corrupcion. Anam pas aquí rebrembar totes los afars de prevaricacion que secotiguèron l’Estat francés pendent de decennias. Auriam pas pro de plaça dins aquela cronica per o far.

            Adoncas, e per tornar al site Net del Conselh Regional de Centroccitània, per cada ficha d’elegit vaquí pas que te vesi un boton amb la mencion « Consultatz la declaracion de transparéncia de l’elegit » ? Cocanha de cocanha, me diguèri la glasnòst vòl dire quicòm en Centroccitània. La sana curiositat del ciutadan que soi me butèt adoncas a quichar sul boton. Mas aquí, pataflau ! Lo visual que me tomba jols uèlhs es pas dels melhors. Lo document es tot pichon, emai pichonet. Ensagi de clicar dos còps dessús en esperant que va grossir. De badas… Res a far. Alavetz, agrandissi la fenèstra tant coma pòdi. Ni per aquò, lo document demòra illegible. Plen de bona volontat me diguèri qu’èri benlèu tombat sul l’unic document mal escanerizat de l’annuari fofotgrafic. Alavetz, cliquèri sus la ficha d’un autre elegit. Me retrobèri de cara a la meteissa anomalia. Non solament l’escritura es pas legibla en causa que los caractèris son tròp pichons, mas de subrepés lo document es trebol. Aprèp verificacion, o son totes. La conclusion es que n’i a pas un que se pòsca legir.

            Sentiguèri, alavetz, coma un malaise prigond. Es pas possible que se trachèsse d’una error tecnica de l’informatician. La causa es talament vesibla que se ieu l’ai vista, de milierats de personas abans ieu l’an deguda veire e senhalada a qual de drech per la rectificar.

Sens marrida fe, me devi rendre a l’evidéncia : lo Conselh Regional de Centroccitània a volgut fa creire qu’èra capable de transparéncia. Mas se me fisi a la realitat s’es plan gardat qu’aquela supausada transparéncia siá vertadièrament transparenta. Atanben soi plan obligat de denonciar aquí una franca malonestetat e quitament una engana. Es una escòrna a l’intelligéncia e una escrocariá. Qu’a a ganhar dins aquel afar lo Conselh Regional Centroccitan ? Se que non a portar un còp de mai la pròva de la duplicitat dels elegits ? Es un marrit còp portat a l’imatge dels elegits e de la fisança que lor poirián portar los ciutadans. Es amb aquela mena de manòbra sornaruda e grossièra que se met en dangièr la democracia. Se pòt pas de contunh mespresar l’elector e a l’encòp li demandar d’anar votar. Quand la politica vira a la marrida comèdia, i a lo fuòc al lenhièr.

   Sèrgi Viaule

Conselh Regional de Centroccitània

Conselh Regional de Centroccitània

Tag(s) : #Sèrgi-Viaule, #Tribune libre, #Tot en Oc, #occitanie

Partager cet article

Repost0
Pour être informé des derniers articles, inscrivez vous :