Overblog Suivre ce blog
Editer l'article Administration Créer mon blog

Lo valent Jacme Servat (1934-2017) nos a quitat

 

            Los occitanistas lo coneissián plan. Jacme Servat, pendent un quarantenat d'annadas, es estat de totes los combats per la defensa de l'identitat occitana. Sortit e demorat gaireben tota sa vida a La Magistèra, en Carcin-Bas, èra mal partit per venir un occitanista de tria.

D'efièch, comencèt per integrar la funèsta armada dels ussards negres de la Republica francesa. Mas èra sens comptar amb l'esperit liure e critic del Titús (atal èra frairalament escaisnomat). Lèu lo jove regent, e probablament qu'un sejorn en França del costat d’Orleans i foguèt per quicòm, tornèt a sas originas e a sa lenga.

            Serà un dels primièrs conselhièrs pedagogics d'occitan. De los que partiràn de pas grand causa e que seràn obligats d'engimbrar lo material pedagogic que lor permetrà de trabalhar. I auriá fòrça causas de dire sul valent Jacme Servat, talament a obrat per l'ensenhament de la lenga.

            Participèt de temps a l'Escòla Occitana de Vilanèva d'Olt, mas subretot militèt per l'escrich.

Foguèt l'autor de mantunes obratges que demest aquestes se tròban los famoses "Garonne Fleuve occitan / Garona, flume occitan (edicions Lobatièras-1987)" e, en collaboracion amb Danièl Borzeix e Renat Pautal, "Révoltes populaires en Occitanie / Revòltas popularas en Occitània (edicions Las Monedièras-1982)". Libres intemporals que se pòdon encara legir amb interés. Seriá tròp long d'escalcir tot lo trabalh tombat per Jacme Servat.

            Los qu'agèron l'astre de lo conéisser ne servaràn lo sovenir d'un companh simpatic e segur. Un òme pausat e discret, emai secretós, que jamai parlava pas a tòrt e a travèrs. Foguèt un militant de l'ombra, eficaç e valent coma l'araire. Emai se se definissiá pas clarament coma nacionalista, tota son òbra foguèt consacrada a la defensa e a l'illustracion de la nacion occitana. O desbrembarem pas.

            Nòstre amic Jacme Servat desfuntèt aqueste 21 de junh de 2017.

Lo Partit de la Nacion Occitana manda a sa familha sas condoléncias entristesidas.

Nòstre amic Jacme Servat desfuntèt aqueste 21 de junh de 2017

Nòstre amic Jacme Servat desfuntèt aqueste 21 de junh de 2017

Tag(s) : #culture, #occitanie, #Tot en Oc