Overblog Suivre ce blog
Editer l'article Administration Créer mon blog

L'imperialisme francés fins a l'absurde

            Felip Folliòt es conse de Sant Pèire de Trevisi, un vilatjon dels Monts de La Cauna en Albigés, e tanben deputat "Novèl Centre" de la primièra circonscripcion d'aquesta comarca. Es la caricatura del notable cumulard nadant dins las aigas trebolas del sistèma jacobin. Aguèt totes los mandats, de conse a deputat en passant per Conselhièr departamental, Conselhièr regional, President de comunitat de comunas e probablament de qualques sindicats intercomunals. Felip Felliòt es, en politica, lo modèl perfièch del carrièrista. Fa pas jamai cap de proposicion originala en politica e passa la màger part de son temps "a laurar los Monts de La Cauna". Valent a dire qu'es un tòca-maneta de competicion tot-terren. Es present al mendre despertin de l'edat-tresena dins lo vilatge lo mai perdut de la montanha. Es totjorn a rastelar fin. Rai ! Sembla un politician de la Tresena Republica coma lo sistèma jacobin los presa.

            Per èsser militant del Partit de la Nacion Occitana m'arriba d'anar véser çò que fan los elegits occitans, quand fan quicòm. I a pas gaire, en aquesta debuta de l'an 2017, quina foguèt pas ma suspresa de constatar que lo deputat de la montanha albigesa se trachava de la sòrt d'una banda de sabla perduda al mitan de l'ocean Indian. Lo brave òme se fa de pensament per l'isla de Tromelin. Benlèu que coma ieu avètz pas jamai ausit parlar de l'isla de Tromelin ? Pas de panica, es normal ! L'isla de Tromelin es una banda de sabla d'un quilomètre cairat de superficia (a quicòm prèp fa 1 quilomètre e mièg de long sus 700 mètres de larg). Se tròba a 450 quilomètres a l'Est de Madagascar e a 535 quilomètres al Nòrd de l'isla de la Reünion. Sus aquel confeti de la republica buta pas un sol arbre. I a pas que de brossas rabrugadas. I demòran pas que d'ausèls e de tartugas, e encara en pichon nombre ! Plan solide i a pas d'aiga bevabla e la vida umana i es impossible. Sens comptar qu'en causa d'una barrièra de coralh s'i pòt pas acostar.

            Alavetz, cossí se fa que nòstre "valent" deputat montanhòl, se trafegue las mesolhas per una lèsca de sable perduda al mitan de l'Ocean Indian ? Saique ! Tre que se tracha de l'integritat territoriala de l'empèri franchimand, l'òme sortís la forca e monta als merlets. En bon imperialista, menimosament formatat per las escòlas del sistèma jacobin, velha a la prosperitat de França que vòl "una e indevesibla". Per aquò, me fa pensar al dictator sirian Bachar el-Assad que diguèt fa pas gaire qu'anava reconquistar lo mendre centimètre cairat del territòri que pensa seu, valent a dire qu'a la volontat de tornar ocupar la part de Curdistan qu'anteriorament èra incluït dins l'Estat sirian.

            Coma apara gaire los intereses occitans de sa circonscripcion, demòra plan temps a tuar al deputat Felip Folliòt. Alavetz, per s'enuèjar pas de tròp entre lo repais dels caçaires d'aicí e l'inauguracion de la sala de las fèstas d'ailà, s'es pres d'afeccion per l'islòt de Tromelin. Se mainèt qu'èra estat signat, lo primièr de junh de 2010, un tractat entre los Estats de França e de l'isla Maurici per la cogestion de Tromelin. Lo tractat foguèt signat, mas pas ratificat. Alavetz, per empachar aquela ratificacion per l'Amassada Nacionala de París es a l'iniciativa d'una peticion per sensibilizar sos collègas deputats.

            Segon el, aquel tranferiment de sobeiranetat privariá França d'un potencial economic excepcional en tèrme d'aigas territorialas (1) mas tanben l'apauririá de 280 000 quilomètres cairats de Zòna Economica Exclusiva (2). Per impressionar lo monde fa remarcar que 280 000 quilomètres cairats, aquò's l'equivalent de la mitat de la superficia de França. Coma se comparason èra rason ! D'ont mai quand òm compara una causa qu'a pas res a véser amb l'autra.

            Plan solide, en bon franchimand segur de son bon drech (exactament coma sos davancièrs èran solides que Tamanrasset èra francesa), pensa pas una minuta que la reivindicion de la Republica de Maurici, vesina de Tromelin, siá logica e justificada. L'imperialisme francés, l'a demostrat de longa, es desprovesit de rason e de logica. Felip Folliòt, que tremòla per sa paura França, pensa qu'aquela ratificacion, s'interveniá, serviriá de fondament per justificar, legitimar e impausar las reivindicacions de Madagascar sus las Islas Eparças, de Mexic sus l'isla de Passion-Cliperton, de Mozambic sus Juan de Nòva  e d'enumerar atal totes los confetis tricolòrs de la planeta.

            Aquestes miserables bonarpartistas, per aflatar la "grandor eternala de França", ne son redusits a refusar a la pichona republica Mauriciana un tròç de tèrra inespitalièra. Aquò per pèrdre pas un territòri de pesca ? Non pas ! la preocupacion màger e avoada de Felip Folliòt es que cal pas cedir sus un principi e un sol : lo de la concepcion de la Republica " una e indevesibla ". Es el qu'o ditz e qu'o escriu ! Son vejaire es probablament de pèrdre pas d'uèi Tromelin per pèrdre pas deman Canaquia o Corsega. Mas a l'ora ont Catalonha e Escòcia son a mand de se ganhar l'independéncia, l'istòria se passarà de las preocupacions reaccionàrias d'un Felip Folliòt.

            Res cambiá jol solelh, l'imperialisme es l'opcion politica unanimament partejada per l'ensems dels partits politics franceses. Ne vòli per pròva que la peticion demandant als deputats de votar pas la ratificacion del tractat amb Maurici es estada mesa en linha per tres deputats : un occitan, Felip Folliòt (Novèl Centre), un alemand d'Alsàcia, Laurent Furst (Los Republicans) e un breton, Gilbert Le Bris (Partit Socialista) ; tres renegaires de lor identitat primièra.

Sèrgi Viaule

(1) Las aigas territorialas (o mar territoriala) es la banda de mar costièra sus la quala s'espandís la sobeiranetat d'un Estat. Sa largor maximala es establida per la Convencion de las Nacions Unidas subre lo drech maritime a 12 milas marins (siá 22 quilomètres e 224 mètres). En cas de dos Estats vesins de mens de 24 milas marins, alavetz lo limit de las aigas territorialas resulta de la mejana de la distància entre los dos Estats.

(2) Una Zòna Economica Exclusiva es un espaci marin que s'espandís al-delà de la mar territoriala d'un Estat. La ZEE s'espandís fins a 200 milas marins (pauc o pro 370 quilomètres) de las còstas estatalas. Al-delà se tracha de las aigas internacionalas. Dins la Zòna Economica Exclusiva un Estat exercís sos dreches sobeirans en matèira d'esplecha e d'usatge de las ressorgas.

Gardarem l'isla de Tromelin !

Gardarem l'isla de Tromelin !

Tag(s) : #Tot en Oc, #Sèrgi-Viaule, #international