Overblog Suivre ce blog
Editer l'article Administration Créer mon blog

La Federacion Francesa de rugbi vòl favorizar França

sus l'esquina d'Occitània.

          Un còp de mai es benlèu pas inutil de notar cossí lo rugbi es un espòrt fòrça popular en Occitània (e tanben dins las parts septentrionalas del País Basc e de Catalonha). Regreti que cap d'estudi seriós siá pas jamai estat menat sus aqueste sicut. O regreti d'aitant mai que s'aqueste trabalh es pas jamai estat fach, es per çò que dins l'esperit de fòrça monde Occitània existís pas. Siá per çò que las gents franchimandas son imperialistas e fan tot per la denegar, siá per çò que que los bailes occitans del rugbi son de monde alienats. Alienats coma o son encara malurosament la màger part dels nòstres compatriòtas. Per çò qu'es de las universitats en Occitània que se poirián clinar sus aquel fach social, nadan dins la cultura e l'ideologia impausadas per París. Ai plan paur que se pòsca pas comptar sus elas per complir aquel prètzfach. Amagatz-me aquela Occitània que vòli pas véser ! Benlèu un jorn qualques sociològs occitanistas se lançaràn dins aquela gasanha ? Soi lo primièr d'o desirar.

            Cossí que ne vira, se los bailes de la Federacion Francesa de Rugbi refusan de saber perqué lo rugbi es plan mai implantat en Occitània qu'en França, pasmens pòdon pas escapar a aquesta realitat. Una realitat qu'al nom d'un imperialisme agressiu pels unes e d'una somission de renegament pels autres, totes vòlon véser desaparéisser. Dins aquesta funèsta amira, fa ja qualquas annadas qu'ensajan de desvolopar lo rugbi en França amb de moneda manlevada en Occitània. Quand escrivi "en França" es per copar cort, mas cal comprene, plan solide, la partida nòrd de l'Estat.

            Alavetz, la sason rugbistica 2016-2017 ven de començar a totes los nivèls de practica. Per ieu e mon club de Sant Sulpici la Punta aquò's la Federala 3. Per d'autres pòt èsser los campionats de comitats, la Pro D2 o lo tòp 14. Lo debat sus las famosas formulas "Balhatz-lor de pan e de jòcs" o "Los espòrts e las religions son los opiums dels pòbles colonizats" es pas de mesa per aquesta cronica. Ça que la, lo pèrdi pas jamai de vista dins ma practica de militant nacionalista, e aquel debat l'aurem al moment d'autras cronicas. A la gròssa, pensi que ne va dels espòrts coma de la consomacion d'alcoòl : lo tròp gasta lo jòc. Lo militant occitanista se deu de practicar/consumir lo rugbi amb moderacion (segon la formula consacrada). Se s'i vòl pas negar, s'i vòl pas passar tota son energia al despens de son accion en favor de la lucha de liberacion nacionala, deu, a mon vejaire considerar lo rugbi coma un léser, un moment de destenta e res de mai. Personalament, mon engatjament dins lo club es lo de benevòl. Se limita a la tenguda de la beguda exteriora (n'avèm una a l'interior de l'ostal del club). De cap de biais serai pas jamai baile. Seriá un investiment que me manjariá tot mon temps. Militant del Partit de la Nacion Occitana, ai quicòm mai a far.

            Rai ! Tornem-ne, s'o volètz plan, a la Federacion Francesa de Rugbi. Aqueste estiu s'es acampada per tornar sus sa tissa favorita : ensajar de desvolopar lo rugbi sus l'ensems del territòri estatal (qu'ela pensa e vòl a tot pèrdre "nacional"). I a de temps que se maina de la causa. I a de temps que s'i copa lo nas, mas l'imperialisme jacobin non sauriá suportar mai de temps que la mapa d'Occitània se dessenhèsse tanlèu que se pausa sul l'Exagòn los clubs de rugbi. Per defugir aquela realitat tangibla e caparruda la federacion temptèt, dins un passat recent, mantunas causas. Tornarem pas sus totas, mas rebrembarem en passant l'organizacion de partidas internacionalas a Nantas en Bretanha e a Lilla en França (faguèron venir de luènh las escòlas de rugbi per emplenar las tribunas). Sens comptar que la F.F.R., se capita d'o far, farà bastir son estadi bèl, en Isla de França. Es aquí-lai qu'implantèt son Centre d'entraïnament.

            Un còp mai rebrembarem als bailes de la federacion que la moneda que manejan ven mai que mai d'Occitània. Ven dels mecènes dels clubs (pensi a l'entrepresa Pèire Fabre per çò que tòca al Castras Olimpic, mas cada club a los seus) e tanben de las dintradas e abonaments pagats pels espectators. Suportaires majoritariament occitans, s'èra encara necessari d'o precisar.

            Se l'estadi nòu se fa, l'afogat occitan de rugbi aurà de pagar per la bastison d'un estadi luènh d'en çò d’el. Un estadi implantat al mitan d'un país paure en rugbi e doncas en amators de rugbi. La conclusion d'aquò es que l'estadi bastit en Isla de França serà emplenat a 80 del cent per d'Occitans qu'auràn pagat un còp per lo bastir e que pagarán un long desplaçament cada còp que lo voldrán utilizar. Los Occitans serián piòts ? Non los Occitans son colonizats !

            Autrecòps aviam una valenta associacion nacionalista nomenada "Associacion pel retorn de la finala del campionat en Occitània" que se trachava de sensibilizar los afogats de rugbi sus aquela question de la necessària presa en man pels Occitans de lors afars e presentament dels afars tocant al rugbi. Malurosament aquela associacion tenguèt pas las uèitanta minutas necessariás per ganhar la partida. Mentretant, la descolonizacion passarà per una presa de consciéncia dins totes los domènis de las activitats umanas e doncas per una presa de consciéncia nacionala dins los espòrts. Aquela defunta associacion a vocacion per ressuscitar.

            L'ultima trobalha de la F.F.R. per favorizar lo rugbi en França, valent a dire a far beure l'ase quand a pas set, es d'ajudar financièrament de clubs franceses a venir professionals ; aquò tre la sason 2017-2018. Vòl ni mai, ni mens, far de discriminacion geografica en dotant de clubs se trobant çò dison "al nòrd d'una linha La Rochèla-Lion". De fach se tracha pas d'una discriminacion geografica, mas d'una discriminacion etnica. Sapient que la federacion prevei de balhar 500 000 € als clubs selecionats, un còp de mai la nacion occitana serà victima d'una espoliacion. Serem victimas d'una descriminacion negativa. Los clucs bretons presentits per recebre lo marrogal son los Vanas e de Sant Nasari. Pels clubs franceses la F.F.R. balha los noms de Borg de Bressa, Nevers, Massin e Chamberin.

            S'aquò se met en plaça -e la federacion a seriosament enveja d'o far- se tracharà d'un tarrible denèc de justícia pels clubs occitans. Non solament serán panats per èsser obligat de finançar de clubs franceses, mas serán atanben penalizats esportivament per tant que los clubs favorisats o serán sus de critèris non pas esportius, mas economics. Caldrà que los clubs en question siaguen enrodats d'un teissús economics pro bèl per poder eventualament finançar un club professional de rugbi.

            Aquò prova plan que la resolucion presa per la F.F.R. es pas esportiva, mas plan politica. Los que pensan encara que los espòrts son pas que l'expression d'un léser politicament neutre se serán per lors fraisses. Voler omogeneïzar la reparticion dels clubs de rugbi sus l'ensems del terrotòri exagonal es una question iminentament politica. Es un biais de far desaparéisser un pauc mai la realitat occitana. Voler vestit Paul en despolhar Pau es una opcion coloniala que devem sens relambi denonciar.

Piri Weepo

Piri Weepo

Tag(s) : #Sèrgi-Viaule, #Tot en Oc