Overblog Suivre ce blog
Editer l'article Administration Créer mon blog

Rescalfament climatic : lo Partit de la Nacion Occitana

per la transicion energetica

Vos prepausam aquí lo resumit d'un article plan mai long e documentat que serà publicat dins lo numerò venent del Lugarn (abonament 20 €/l'an - chèc de mandar a : Lo Lugarn – 34, avenguda dels Pirenèus – 47 390 Lairac).

    Totòm es d'acòrdi per dire que luchar contre la pollucion e sas consequéncias que son los gases a efècte de sarra passa pel desvolopament de la produccion d'energias renovelablas. Totòm ? Que nani ! Coneissèm en Occitània una mena de personatges que, amagats jos la masqueta de l'ecologia intransigenta, entravan, o ensajan d'entravar, tot projècte de desvolopament de l'idrolic, del solari, o de l'eolian. Vòlon pas ges de cambiament ni de progrès.

    Aquel monde fan, siá pròva d'incoëréncia, siá de malonestetat intellectuala, siá, pièger encara, d'un individualisme indicible. Fan mina de saber pas que i a urgéncia. Son dins l'immediatesa, incapables d'anticipacion. Lor defauta l'intelligéncia de la prevision a mejana e longa temporadas.

    S'es per dire que d'eolianas performantas devon èsser quilhadas en mar puslèu que sus tèrra, cresi que la causa fa l'unanimitat. Fòra que pel moment la tecnica de las eolianas flotantas de bon rendament es pas encara completament al punt. Los engenhaires i trabalhan, e i trabalhan fèrme.

    Alavetz, e es urós, aquí ont lo vent bufa, las entrepresas de produccion d'energia eoliana ensajan de trabalhar. O fan dins un encastre legislatiu sarrat. Çò qu'es normal dins un estat de drech. Actualament la lei enquadra escrupulosament tota obtencion de permés de bastir. Las constrenchas de respècte de l'environament son, condreitament, sevèras. Los procediments d'obtencion d'aqueles permeses son longs e complicats. Necessitan sovent d'annadas de temps entre lo projècte e son eventuala realizacion. Requerisson de demarchas administrativas fastigosas. Mentretant contunham de cremar de petròli per produsir d'electricitat.

    Mentre que los contratots[1] ensajan d'entrepachar la transicion energetica, en Lauragués, los ciutadans son estat nombroses a s'entindar dins dos projèctes eolians. De mercés al sitinet lendosphere.com, foguèt lançada una crida al finançament participatiu per l'estudi d'aquestas infraestructuras. Foguèt un succès dels bèls. Aquelas doas implatacions son previstas sul territòri de la comunitat de comunas de Castelnòudari. L'operacion de manlèu que deviá a la debuta recampar 250 000 € foguèt complida en solament una setmana. Atanben, encoratjats per aquel afogament, los promotors dels projèctes portèron la collècta a 325 000 €. Foguèron atanlèu recampats en una virada d'uèlh.

    Las motivacions de cadun dels investisseires son estadas divèrsas. Se qualqu'unes confessan que lor participacion es unicament apevada sus la rendabilitat financièra del manlèu de mercés a d'unes intereses a 7 del cent ; la màger part soscriguèron per de rasons eticas e ciutadanas de solidaritat. N'i a quitament que d'aquel biais volguèron participar al desvolopament economic local. La possibilitat de crear d'unitats pichonas e mejanas de produccion d'electricitat es un aspècte important del desvolopament de las energias renovelablas. Se pòt tanben crear de cooperativas tala qu'Enercoop qu'es en mesura de fornir a tot un cadun una electricitat garantida eissida de las energias renovelablas. Aquesta cooperativa de consumeires es basada a París, mas lo Partit de la Nacion Occitana ne preconiza la creacion en Occitània tota.

    Emai se lo carrejaire del produch demòra monopòli d'Enedis que possedís lo rasal, l'abaudida de la produccion d'electricitat partent dels mòdes renovelables, permèt una cèrta decentralizacion dins l'amainatjament dels territòris. Permèt atanben la creacion d'emplecs. Tantas causas beneficas per l'economia d'Occitània.


[1] Un contratot, coma lo neologisme l'indica de per el, es una persona patologicament contra tot.

Transicion energetica.

Transicion energetica.

Tag(s) : #Lo Lugarn, #écologie