Overblog Suivre ce blog
Editer l'article Administration Créer mon blog

Salvar l'Universitat Occitana d'Estiu

          Ja, l'an passat, sus un autre mèdia, delargavi una crida de sosten per l'Universitat Occitana d'Estiu de Nimes. Sabi pas mai amb quines mots o fasiái, mas ja demonstravi l'interés e la necessitat d'un tal rescontre annadièr. Se los autres rescontres estivals que son las Ecòlas de Vilanòva d'Olt, de La Guèpia e de Provença, son mai que mai de luòcs e de temporadas d'aprendissatge de la lenga ; l'Universitat Occitana d'Estiu de Nimes es una vertadièra universitat populara de cinc jorns plens. Es un estagi vertadièr d'escambis de las coneissenças e de formacion, dobèrt a totes. Los aspèctes e questionaments tocant l'economia, lo social, la cultura e autres sicut erat en relacions amb Occitània i son abordats sens tabó, en convivéncia e paratge.

            Cada an, e aquò desempuèi quaranta ans (ongan se festejava a Nimes la quarantena universitat), lo programa prepausat per la Marpòc (seccion gardenca de l'Institut d'Estudis Occitans) es d'una riquesa espectaclosa. O disi sens exageracion que totòm se'n pòt mainar de per el. Basta pas per cadun, la prima arribada, que d'anar espiar sul siti de la Marpòc -e eventualament imprimir- lo programa de l'universitat. De mercés a Jòrdi Peladan e a la còlha que l'ajuda dins son prètzfach, los intervenents e los espectacles que fan lo contengut del rescontre son sempre de qualitat. A n'aquel prepaus, los que i pòdon pas participar per de rasons de constrenchas màgers, pòdon, siá dich en passant, crompar los annals d'aquestas universitats que la valenta associacion gardenca, malgrat las dificultats de publicar aquela mena d'obratge, s'esperfòrça de far espelir. Aquestes annals son en venta sul sitinet de la Marpòc, coma tanplan aquò se pòt comprene.

            Per plan insistir sus l'interés e la riquesa del programa de las Universitats Occitanas d'Estiu de Nimes, e probablament vos balhar l'enveja d'anar a la de 2017, vos balhi lo de la tinada 2016. Dintrarai pas dins los detalhs, mas parlar pas del trabalh caporal que se fa a l'Universitat Occitana d'Estiu de Nimes seriá, per un nacionalista, un pecat grèu. Tot trabalh al servici de la nacion occitana, per tan menèl siaguèsse, es important pel procediment de liberacion nacionala. A pus fòrta rason quand se tracha del sol moment annadièr de vertadièra reflexion sus l'accion occitanista dins son sens lo mai larg.

            Abans de degrunar lo programa que se debanèt en 2016, precisem que la velha d'aquestas cinc jornadas sarradas de soscadissas èra consacrada a la descobèrta de la vila de Nimes amb un percors dels luòcs e dels personatges qu'an fach son istòria. Ongan, aquesta descobèrta èra estada escricha e mesa en scèna per la comediana Anna Clamenç de la companhia Gargamèla.

            A l'Universitat Occitana d'Estiu de Nimes se parlèt, entre maintas causas, d'edicions amb l'editor Renat Turc. De traduccion amb la catalana Silvia Aimerich. D'istòria e de musica amb lo remirable Gerard Zuchetto qu'es lo saberut mondial dels trobadors. Un òme d'unas grands discrecion e modestia e pr'aquò que porgís fòrça a la cultura nòstra. De diversitat e de desvolopament local amb l'italian Giovanni Agresti que nos escalciguèt la situacion actuala dins l'enclavament occitan de Gàrdia Pemontesa. Agèrem drech a un expausar plan alestit per Riccardo Lage (Occitan d'origina argentina) sus "La tresena revolucion industriala d'aprèp las idèias de Jeremy Rifkin". Una conferéncia de sociolingüistica suls contactes entre occitan e catalan balhada per Nicolau Biolay. Una autra, presentada dins la meteissa vesprada per Matieu Casanòva, sul tèma de la joventut e de l'avenidor de la lenga. E quitament una comunicacion d'Adrian Roux, professor a l'Universitat d'as Ais, tocant las prioritats necessàrias per renfortir la lucha contra la corrupcion en França. Coma qué, a l'U.O.E. de Nimes las questions politicas son tanben abordadas.

            Arresti aquí la longa litània del programa, tot sapient que vos ai balhat pas que las doas primièras jornadas de programa sus las cinc que compte l'universitat. Mas doblidarai pas, ça que la, de precisar que cada serada es consacrada a un eveniment cultural. En 2016 agèrem drech a dos balètis, un concèrt de cants trobadorencs d'una grand tenguda, una pèça de teatre amb lo remirable comedian a meteire en scèna qu'es Andriu Neiton, una perfomància teatrala d'Anaïs Vaillant, e un film. Agèrem encara ongan un programa fornit e eclectic.

            Malgrat un article long de presentacion istorica e de promocion de l'U.O.E. paregut dins lo numerò 115 de març/abrial/mai de 2016 de nòstre confraire "Occitans !", revista papièr difusida a totes los sòcis de l'Institut d'Estudis Occitans, semblariá que las gents l'agen pas legit. S'o an fach, an pas sentit la necessitat -pr'aquò imperiosa- de se mobilisar per ajudar aquel aplech indispensable a l'occitanisme en s'i inscriguent. Solide que degun possedís pas lo don d'ubigüitat. Podem pas èsser dos o tres endreches a l'encòp. Entre milanta causas qu'avem a far per far viure la nacion, me sembla ça que la que de privilegiar sa pròpria formacion de ciutadan e de militant occitanista, poriá èsser un biais de júnher l'util a l'indispensable. Cal ça que la deplorar que la promocion del rescontre es pas totjorn facha correctament. Ne vòli per pròva qu'es pas que dins lo numerò del 8 al 21 de julhet de 2016 de La Setmana que pareguèt la publicitat, sus una pagina sancèra, de l'U.O.E.. Recebèri lo jornal qu'èri dintrat de l'Universitat. Desastrós descalatge !

            Amb ongan un trentenat de participants permanents en mejana cada jorn (de monde i passant una jornada o doas), l'U.O.E. es tornamai en perilh de non rendabilitat, e doncas de mòrt. Es de rebrembar qu'a la debuta de la creacion de l'universitat, son de centenats de personas que i participavan. Per balhar un òrdre d'idèia, e segon las quitas chifras de l'U.O.E. ; en 1973, 450 personas i participèron. En 1978 i aviá encara exactament 381 inscriches. A l'epòca, s'i caliá marcar plan en avança per poder obténer un albergament. D'uèi, l'U.O.E. es d'ont mai en perilh que l'Agora, l'estructura d'acuèlh dins la quala se debana actualament, es a mand de barrar sas pòrtas. Atanben, la còlha organisatritz es a cercar un autre endrech a Nimes, çò que serà pas aisit a trobar. Aquí una dificultat que se ven ajustar a la demesida de frequentacion.

            Cossí formar la nòva generacion de militants occitanistas qu'esperam totes se l'Universitat Occitana de Nimes deviá far quincanèla ? Sabem ben que l'U.O.E. es pas lo sol luòc formator de l'occitanisme, lo Partit de la Nacion Occitana es tanben, de mercés a sas instàncias, sos mèdias, son accion e reflexion permanentas, un aplech formator. Pasmens, per progressar, l'occitanisme a besonh de tot çò qu'a sabut bastit. Se per malastre deviá patit l'amputacion de l'Universitat Occitana d'Estiu de Nimes seriá una catastròfa que marcariá lo descreis de la Resistància a l'imperialisme francés.

Sèrgi Viaule

Universitat Occitana d'Estiu.

Universitat Occitana d'Estiu.

Tag(s) : #Tot en Oc, #Sèrgi-Viaule