La cronica de Sèrgi Viaule (15) : Mai d'argent per Johnny Hallyday que per la cultura nòstra

            Lo 13 de julhet passat Johnny Hallyday balhava un recital de sas cançons a Pàmias, en comtat de Foish. L'informacion, pas que per ela, a pas res de plan extraordinària. Almens tant qu'es pas anonciat que cantèt davant un public estequit. Un public plan en-deçà de las previsions esperadas. Alara que l'associacion organisatritz Pàmias eveniments esperava 10 000 espectators a l'estadi Pèire Balusson per lo venir escotar, n'agèt pas qu'un pauc mai de la mitat. L'edicion ariegesa de La Despacha de Tolosa, lo lendeman del concèrt, anoncièt 7 000 espectators. En ajustant còpsec "Pel descompte exact, veirem pus tard". Aquò ditz, sus la fòto de l'estadi prepausada, fòrças travadas èran orfanèlas. Aquela desafeccion del public agèt, plan solide, de consequéncias sus l'equilibri financièr de l'operacion.

            Quand foguèt alestit lo budgèt previsional, las previsions de frequentacion foguèron exageradas ; o tanplan fantasierosas, coma son nombroses los Apameans a o pensar. Forçadament, la desafeccion relativa del public desequilibrèt una balança comptabla demasiadament optimista. D'ont mai que, per aver un pauc de monde, los organisators rebaissèron los preses de las plaças. De tota la virada de l'artista es probablament a Pàmias que se poguèt ausir lo recital a mendre còst.

            Quinze jorns abans lo concèrt (que siá ditz en passant èra titolat "Demorar viu" sens dire a quin prètz) mancava ja 150 000 euros per assegurar los engatjaments dels organisators. Foguèron demandats a la comuna. Aquesta se retrobèt aculada de cara lo fach complit. Compte tengut de sa participacion pecuniara ja autrejada e son ajuda materiala dins l'organisacion en amont, anullar lo concèrt li auriá costat pus car que la soma subredemandada.

            D'aquel afar mal virat, la premsa diguèt pas s'èra la consequéncia d'una publicitat mal alestida a l'entorn del concèrt o se los Occitans n'an pro de Johnny Hallyday. Benlèu que los organisators comptèron un pauc tròp sul public tolosan ? Tot comptat e rebatut foguèron los Apameans que se retrobèron dins la pachaca. Lo Sr Ubèrt Lopez, president de Pàmias eveniments e conse-adjunt, se pòt vantar d'aver mes sa vila dins lo fangàs. De mercés als capricis d'una persona plan plaçada al Conselh municipal, e d'una associacion visiblament mal bailejada, la comuna de Pàmias deguèt votar d'urgéncia una subvencion exepcionala de 150 000 euros per aver lo rocquaire franco-estasunian dins sas parets.

            Condreitament, l'oposicion refusèt de votar aquesta alonga suplementària a l'associacion en falhida. Lo jorn del vòte tornèt rebrembar que Pàmias eveniments èra ja estada abondosament subvencionada per aqueste concèrt. Per l'oposicion al Sr Andriu Trigano èra pas question de salvar del naufragi una associacion menada per una còla d'incapables. Malgrat aquò, la subvencion exepcionala foguèt votada per la majoritat. Los opausants an calculat que la soma representava 1,5 % dels impòts amassats per la comuna. Atal, se los Apameans veson lors talhas municipalas aumentar l'an que ven, saurán a qual o devon.

            Un còp de mai ne soi a me demandar -reversièr de natura- çò que se seriá passat se la calandreta de la vila o lo cercle Propèr Estiu, cercle local de l'Institut d'Estudis Occitans, avián fach un trauc de 150 000 euros dins sa tresaurariá. La comuna seriá venguda a la rescorsa ? L'associacion en quincanèla, ja grassament dotada inicialament tornem o dire, poguèt atal beneficiar dels denièrs publics pel lifritge de la banda a Johnny Hallyday que poirà d'aise despensar als Estats Units d'America las pistòlas dels contribuables apameans.

            Es inacceptable de véser un còp de mai cossí una comuna occitana es capabla de dilapidar l'argent public per la cultura francesa, mentre que tanlèu que se tracha de respondre a una demanda rasonabla per la cultura occitana, totcòp, cal estalviar "que las dotacions d'Estat son estadas demesidas". Dins un contèxte ont es demandat de longa a las associacions occitanas de far pinquet, nos cal de longa denonciar aquel fach escandalós.

            Lo cas de Pàmias es pas un cas isolat en Occitània. "Pausa guitarra", lo festenal de musica d'Albi, es estat deficitari mai d'un còp, e mai que mai tras que seriosament per son edicion de 2015. Lo trauc financièr foguèt de mantunes centenats de milièrs d'euros. Aquí tanben foguèt las collectivitats territorialas (comuna d'Albi e Conselh despartamental d'Albigés) que metèron la man dins lo marrogal per comolar las pèrdias. Aquò, encara e sempre, sus l'esquina dels contribuables. Pàmias e Albi son dos exemples, mas solide que se'n poiriá citar maites. Aqueles patricolatges son pas sonque las consequéncias de la falhida dels festenals dedicats a la cançon. Concernisson tanben los festenals de teatre, de musica classica, de dança, etc…

            La venguda de l’estèla franchimanda a Pàmias ressonèt dins lo cap d'unas personas coma una escomesa culturala de prestigi. Foguèt una temptativa disproporcionada per rapòrt a l'economia supausada la recebre. Mas atal foncionan las mentalitats dins los mitans dels professionals de la cultura franchimanda : mai lo balajum es gròs e melhor capita a se vendre als notables locals. Alavetz, la causa es d'ont mai aisida quand, coma dins lo cas de Pàmias, aquò's la meteissa persona qu'es demandaira de subvencion e elegida decideira de subvencions. Per tan susprenenta que paresca la causa, aquò sembla legal. L'oposicion que sèit al Conselh municipal de la vila a ben demandat la demission del Sr Lopez, mas l'a pas obtenguda. Aquel fach demòstra un còp de mai que, a quin nivèl decisional que siaga, cal rarament comptar sus la probitat dels politicians enfeudats.

            Nautres, nacionalistas occitans, nos cal a tot còst denonciar los abuses de poder a quin escalon que se practiquen. I pòt pas aver doas mesuras per un meteis pes tanlèu que se tracha de promocionar una cultura exportada e de far viure e metre en valor la cultura nòstra.

            Sèm de longa constrenches a pagar d'impòsts que servisson en partida a far s'exprimir de monde coma Johnny Hallyday mentre que nòstres artistas son inicament enebits d'ondas, d'antenas e d'empont. Pro de la dobla pena impausada per poder parisenc, mas tanben dels notables occitans enfangats dins los esquemas mentals dels partits politics franchimands ! Sola la liberacion nacionala metrà fin a n'aquela tarribla injustícia.

Sèrgi Viaule