Overblog Suivre ce blog
Editer l'article Administration Créer mon blog

La cronica de Sèrgi Viaule (9)

Noms de las regions : mèfi a Bas-de-França !

           Fòra Occitània, en Flandra e al Nòrd de França, los elegits del Conselh Regional de la region novèla an causit de li balhar un nom tras que jacobin : "Nauts de França". Sembla que serà tanben lo nom retengut per las autoritats estatalas. De tot biais aquesta denominacion va dins lo sens de çò preconizat pel poder francista que vòl pas ausir parlar de nom identitari. Los tecnocratas an pas pogut cambiar los noms de Bretanha nimai de Corsega, mas van aprofiechar d'aquela reforma per escafar de la mapa Alsàcia, Auvernha e Lemosin.

            Aquel Nauts-de-França me fa freg dins l'esquina. Se lo darrièr mot reven al Conselh d'Estat e al poder jacobin dins totas sas compausantas, aquestes riscan de seguir la dralha dobèrta del Conselh Regional flandro-picard. M'estrementissi a l'idèia que la nòva region nascuda de la fusion de Miègjorn-Pirenèus e de Lengadòc-Rosselhon venga Bas-de-França. Atal los Centroccitans vendrián de franceses de bassa man. Autrament ditz, de jos-franceses. Semanticament los imperialistas farián d'una pèira, doas tòcas: primièrament seriam privats de nòstra identitat d'Occitans per venir Franceses, mas seriam de Franceses de bassa extraccion. Espèri qu'aquesta cachavièlha se realizarà pas, mas se cal esperar al pièger. Seriá pièger encara que Sud-de-França, s'i pòt aver una gradacion dins aquela mena d'infamia

            Per desetnizar definitivament las regions, lo poder en plaça es al trabalh. Lo governament a la possibilitat d'impausar la denominacion de la novèlas regions per decret. En ultime ressòrt aquò's lo Conselh d'Estat que balharà, o pas, sa benediccion. Avèm pas acabat de nos far una sang de vinagre. "Caldrà un afortiment volontós dels ciutadans per que los tecnocratas ajan pas lo darrièr mot", çò declarèt a La Despacha de Tolosa lo primièr d'octòbre de l'an passat, lo Joan-Loís Blenet, president de la Confederacion de las calandretas. Emai es vertat que nos caldrà demorar mobilizats al Partit de la Nacion Occitana e dins las autras entitats occitanas se volèm far marcar lo nom de nòstre país sus la mapa del monde.

            La nòva region nascuda de la fusion de Miègjorn-Pirenèus e de Lengadòc-Rosselhon a causit un long procèssus per se determinar. Pel moment sabèm pas grand causa del mecanisme de votacion nimai del còs electoral que serà sollicitat. Se parla d'una consulta ciutadana que se debanariá al mes de junh. Aquesta se fariá per via de premsa e Internet. Res es pas precisat pel moment. La sola causa que podèm dire, aquò's que las causas avançan. Èra estat anonciat un "comitat del nom" d'un trentenat de personas amb paritat femnas-òmes que deviá comprene tota mena de personalitats. Èran prevists d'istorians, de geografs, d'artistas, d'esportius, de lingüistas, et quitament èra indicat que i auriá de catalanistas e d'occitanistas. Aquela mena de comission auriá per tòca de prepausar un desenat de noms possibles abans lo 15 d'abrial d'ongan.

            Causa dicha, causa facha ! La tièra de las personalitats qu'aurán de selecionar los noms qu'ulteriorament serán meses al vòte, es estada publicada lo 17 de març de 2016. Aquela tièra, l'avèm espepissada menimosament per véser se correspondiá a çò d'anonciat. Aguèrem, vo'n dobtatz, qualquas suspresas. La categoria socio-professionala la mai representada, aquò nos penjava al nas, es la dels intervenents dins lo domèni de la cultura. Son sièis de catalogats dins aqueste domèni d'activitat. Mas atencion ! Pas un sol representant de la cultura occitana. Pas que de monde que trabalhan dins las grandas institucions culturalas. D'unes son dins lo teatre e d'autres dins las bibliotècas o lo cinèma. Lo sol cantaire-musicaire present es Cherfi Magid del grop Zebdà. Un òme nascut a Tolosa, qu'a la debuta de son encarreirada artistica foguèt ajudat pel sector musica de l'Institut d'Estudis Occitans, mas qu'al moment de son passatge sus l'empont de l'Estivada refusèt de dire quitament "bonser" o "Cossí anatz ?". Exactament coma se veniá de tombar de Mars. Pensi que caldrà pas comptar sus aquel arribista per una denominacion occitana de la region.

            Autra suspresa de talha, aquò's lo nombre dels caps d'entrepresa. Son cinq. Quand òm sap que lo monde dels afars, per lusir a l'exportacion, son lèstes a batejar lors entrepresas d'un nom anglés, i a de pensament a se far sus lor sentiment identitari occitan. Mèfi ! disi pas que siá pas una bona causa de trabalhar a l'exportacion, disi que se pòt trabalhar a l'exportacion en demorant occitan. Autrament s'i tròba tanben tres agricultors-viticultors, tres esportius, tres scientifics e dos istorians. Çò pus estranh es que se retròban sus aquela tièra tres cosinièr-restaurators. Sabi qu'en Occitània aiman plan de far repaissòla, e benlèu mai particularament dins aquesta region, mas d'aquí aquel subrenombre de cosinièrs aquò interròga. Rai !

            I a tanben, e es urós, una liceana e una feminista. Cal saludar lo fach que la paritat dels genres siá estat respectada. Es quicòm que dintra ara dins las mentalitats e es tan milhor. La règla de la paritat en politica auriá quitament pogut èsser establida desempuèi bèl briu.

            E los catalanistas e occitanistas dins aquò, n'anatz demandar ? E ben aquí, pauròts, la decepcion es de talha. Dins lo trentenat de noms trapèri lo de Joan Becat, lo geograf catalan qu'es tanben militant catalanista. Ai pas sabut trobar cap autre catalanista dins la lista.

            D'occitanistas, n'i a pas que dos. Avèm Bertrand De La Farga, istorian plan conegut a Tolosa e Joan-Francés Laffont, lo valent president del collectiu Convergéncia occitana, qu'es pas mai de presentar. Aquò fa gaire e riscan d'èsser negats dins un magma francholhard de primièra.

            Cossí que ne vire, aquò's lo 15 d'abrial qu'aqueste ditz "comitat del nom" deu fornir lo desenat de noms que seràn meses al vòte. Va càler èsser rufes al combat se volèm escapar a las causidas governamentalas que poirián èsser "Pirenèus-Lengadòc", "Sud-de-França" o pièger encara "Bas-de-França". Çò solide, es que los militants del Partit de la Nacion Occitana de la region demòran mobilizats.

Mèfi a Bas-de-França !

Mèfi a Bas-de-França !

Tag(s) : #Sèrgi-Viaule, #Tot en Oc