Overblog Suivre ce blog
Editer l'article Administration Créer mon blog

Drech de responsa del Partit de la Nacion Occitana al comunicat de premsa d’Iniciativa per Occitània entítolat « Iniciativa per Occitània demanda publicament una clarificacion al PNO publicat per Jornalet lo 1èr de genièr de 2016 

A Iniciativa per Occitània, son revoltats e estabosits per las dichas d’asirança contra los musulmans d’unes sòcis del PNO e d’unes redactors del Lugarn que trobèron dins lo Lugarn n° 114 de la prima passada. An de retard dins l’indignacion e es curiós per pas dire suspècte. Se trachariá pas d’un pretèxt per atacar lo PNO? Domergue Sumien, un dels responsables d'Iniciativa per Occitània coneis perfièchament la doctrina de Fontan e lo PNO que ne foguèt membre. A pas res de melhor a far, coma nacionalista occitan independentista, que d’atacar un partit que per çò essencial a las meteissas idèas que las seunas?
Dins lo Lugar nº114 (prima de 2015) Iniciativa per Occitània acusa Pèire Pessamessa e Sèrgi Viaule de se declarar islamofòbs. Domergue Sumien e  sos amics an pas remarcat que lo sostítol del Lugarn es "tribuna per l'Occitània liura". Publicam sens censura de tèxtes qu’engatjan pas que lors autors e pas lo Partit de la Nacion Occitana. Sèm engatjats per l’editorial, los comunicats de premsa e los articles signats PNO. Cadun es liure de reprochar al Pèire Pessamessa e a Sèrgi Viaule lors posicions. Per contra, cal èsser prudents abans d’emplegar lo mot « islamofòb ». Aquel mot es sovent un instrument per empachar tota critica de l'Islam. Subretot, avèm un corrièr dels legeires dins le Lugarn e, al lòc de portar d’acusacions grèvas sus la plaça publica, acusacions que mancaràn pas d’èsser espleitadas per nòstres enemics, auriá calgut escriure a la redaccion e , va solet, que auriam publicat aquelas reaccions sens la mendra censura. Disètz que lo PNO a lo dever de se dobrir a totes los Occitans e aquò val pels occitans musulmans. Avèm pas de leiçons de dobertura a recèbre de degun e lo PNO es dobèrt a totes, quina que siá lor religion o abséncia de religion o lor origina (occitans de naissença o d’adopcion). Los que pretendon que avèm traït Fontan son de messorgaires (sovent d’ancians membres agrits del partit) e de mai an pas plan legit los escrichs del PNO. Deurián tornar legir lo punt uèit de nòstre programa:"8) Occitània es una tèrra d’acuèlh pels imigrats del Sud (en particular del Magrèb per de rasons istoricas) e del Nòrd (franceses e mond d’autres païses de l’Union europèa). Lor bona integracion passa forçadament pel moment per la coneissença de la lenga de la republica francesa, lo francés mas, a tèrme,passarà tanben per la coneissença de l’occitan que deurà èsser un avantatge pels demandaires d’un emplec public. Passa tanben pel respècte de las règlas de la vida comuna dins una societat democratica e excluís lo comunautarisme."
Afortissètz que l’islamofobia (l’asirança dels musulmans) es una traïson del nacionalisme occitan e donc suggerissètz que sèm de traïdors del nacionalisme occitan. Cal rementar que l’etnisme del Partit de la Nacion Occitana es complètament contrari al racisme, a la xenofobia e donc a l’islamofobia ? Mas caldriá pas tanpauc que lo repròchi d'islamofobia serviguèsse a far calar tota critica de la religion musulmana, una critica que deu pas èsser reservada als sols musulmans.
Denonciatz la siá-disent islamofobia enrabiada de Sèrgi Viaule e de Pèire Pessamessa. Son liures de vos respondre o non mas per quant a nosautres, l’acusacion de « asirança irracionala » de lor part es absurda e malonèsta.
Avètz, çò disètz, defendut lo PNO, Fontan e manifestat vòstra solidaritat e amistat amb los companhs del PNO mas vòstra solidaritat es pas anada fins a publicar nòstres comunicats de premsa mentre que publicam los vòstres.
Vos demandatz se lo PNO vòl bastir la nacion occitana amb totes sos estajants, de totas originas e de totas religions ? La responsa es evidentament positiva. Es una question plan inutila.

Nos demandatz se volèm encara combatre lo racisme e l’intolerància ? Figuratz-vos qu’avèm pas esperat las injoncions d'Iniciativa per Occitània per o far.
Segon vosautres, deuriam tornar metre d’òrdre dins las presas de paraula dels aderents del PNO. Aquela demanda es extrordinària !  Es la responsabilitat exclusiva de la direccion del PNO de contrarotlar la presa de paraula de sos aderents. Avèm pas a obesir a d’òrdres donats de defòra.

Nos demandatz de tornar metre d’òrdre dins lo Lugarn ? Soi lo cap redactor del Lugarn, avèm un comitat de redaccion. Fa son trabalh en acòrdi amb los principis del PNO e es lo sol abilitat a o far.
Iniciativa per Occitània, que sos membres se dison amics del PNO, s’es comportat d’un biais perfièchament inamical en difusant lor comunicat sens nos daissar lo temps de lor respondre  abans. Esperavem un autre comportament de lor part. Al lòc de demorar dins lor esplendid isolament e de donar de leiçons de morala suls rets socials, aurián melhor fach de venir amb nosautres sul terren e de participar a las eleccions.

Jean-Pierre Hilaire, vice-président du PNO

Partit de la Nacion Occitana.

Partit de la Nacion Occitana.

Tag(s) : #COMUNICAT( Oc ), #Tot en Oc