Overblog Suivre ce blog
Editer l'article Administration Créer mon blog

Nos cal salvar La Setmana

       Quantes de còps ausiguèri dins las annadas setanta e uèitanta lo monde dire que nos fasiá besonh una premsa escricha, radiofonica e televisuala per socializar e transmetre la lenga nòstra? David Grosclaude que teni èsser l'òme que faguèt avançar l'occitanisme a passes de gigants, agèt l'èime e lo fetge, tre lo mes de mai de 1995 (fa ara 20 ans) de lançar La Setmana, un ebdomadari tot en occitan. De mercés a l'engatjament social de son fondador, agèrem e avem un remirable aplech de comunicacion. Amb La Setmana l'occitan trapar un pauc d'utilitat sociala e subretot ganha en dignitat.

       Sabi-ben que desempuèi vint ans los mejans de comunicacion de massa an evoluits. La premsa escricha se legís mai que mai sus ecran. Avem qualques sitis Internet a gratís en lega occitana sus la tela. Es una plan bona causa e los cal desvolopar. Pasmens, coma dins totes los paises del monde, aquestes devon venir en concomitància, en complementaritat amb la premsa escricha sus papièr. La diversitat de l'informacion deu anar cotria la diversitat dels suports d'aquesta informacion. Es la rason per la quala La Setmana papièr es un utís que nos es indispensable. Trapam dins La Setmana d'informacions que son pas tractada endacòm mai. Totas las lengas vivas an a lor servici, a l'encòp, una premsa ecricha electronica e una premsa escricha papièr. Podem pas far excepcion.

       Nos podem pas amputar d'un mèdia! Seriá balhar rason a los que desempuèi de sègles fan tot çò que cal per eradicar l'occitan de la susfàcia de la planeta. Seriá ajudar los opressors a nos assimilar. Pels aujòls que nos transmetèron la lenga e pels felens als cal la nos cal ofrir, podem pas daissar s'anequelir un aplech que meterem tan de temps a far espelir. Pas cap de pòble s'es pas jamai desliurat sens premsa, e a fortiori sens premsa escricha papièr.

       La Setmana es un jornal d'informacions generalas qu'abòrda, sens tabó ni frontièra, totes los sujèctes d'actualitat (societals, economics, socials, politics, culturals, esportius, etc…). Avem aquí l'astre d'aver un setmanièr complet e plan illustrat de fotografias de colors. Avem aquí un produch professional que fa gaug d'aver en man. Un aplech que se l'aviem pas, seriem de longa a lo reclamar. Nos cal èsser fòrts e far lo necessari per servar çò qu'existís e qu'avem mes d'annadas a bastir. Nos cal rebussar las marcas e nos batre per perennisar çò nòstre.

       Fa qualquas setmanas que la còla de Vistedit tira sus l'esquila d'alarma. Dins lo darrièr numerò, lo 1039, precisan que per de rasons economicas, al mes de novembre lo setmenari sortirà pas que cada quinzenada. An besonh de mai d'argent per virar e doncas d'abonats suplementaris per poder capitar de téner pè a la bòla. Es lo primièr còp de son istòria que La Setmana es dins aquesta penibla situacion. Los abonaments se renovelan pas e de novèls arriban pas. Es pas normal.

       Se totes los aparaires de la lenga occitana fasián l'esfòrç de s'i abonar, es pas un ebdomadari que poriem far viure, mas un quotidian en lenga nòstra. Sosténer la lenga, sosténer concretament una lenga, aquò implica de sosténer los mejans de comunicacions dins aquesta lenga. La Setmana es una vertadièra institucion dins lo paisatge cultural occitan. Es bailejada per una còla professionala e seriosa qu'a fach sas pròvas. La lenga n'a besonh per viure e per polsar. L'occitan a besonh de La Setmana. Avem besonh de La Setmana.

       L'abonament annadièr a La Setmana es pas car. Pòt pas èsser aquò qu'empacha las militantas e los militants de s'i abonar. Es probablament mai sovent una neglidéncia, un oblit, que non pas una impossibilitat pecuniària. Tornem o dire La Setmana es un jornal generalista politicament neutre. Porgís a cada occitanofòn la possibilitat d'aver accès a l'informacion dins sa lenga. La Setmana deu pas desaparéisser. A besonh de vòstre sosten. Seriá greu de l'abandonar, de la daissar càiser al moment ont justament avem lo mai besonh d'ela.

       Podem pas de longa demandar als autres de far a nòstra plaça. Nos cal prene sus nautres la volontat de viure. L'avenidor de La Setmana es tanben nòstre avenidor en tant qu'Occitana e qu'Occitan. Serem çò que bastirem!

       La Setmana pòt encara èsser salvada, mas i a urgéncia :

gestion@lasetmana.fr  tel: 05 59 81.02.59 

                           Sèrgi Viaule, lector de La Setmana desempuèi lo primièr numerò

La Setmana deu pas desaparéisser.

La Setmana deu pas desaparéisser.

Tag(s) : #Tribune libre, #Tot en Oc