Charlie Hebdo : Contra la barbariá lo Paratge

Contra la barbariá lo Paratge

La colèra e lo fasti davant la barbariá de l’ataca menimosament preparada contra los jornalistas de Charlie Hebdo dispensan pas d’una analisi d’aquel eveniment tragic que s’inscriu dins un procèssus que pertòca dempuèi de decènnis lo monda arab e mai generalament l’Omma o comunautat dels cresents de l’Islam. La falhida del nacionalisme arab de tip nasserian de las annadas 1960 a daissat la plaça a de corrents islamistas de replegament sectari cap a un mitic Islam de las originas dont la tòca es la restauracion del califat e a tèrme la conquista per la violéncia e la somission de la tèrra sencera a l’Islam tal coma l’interprètan. Al meteis temps, l’afrontament entre Sunnitas e Chiitas, las doas grandas brancas de l’Islam, se radicaliza.

Los darrièrs avatars d’aquel islamisme radical e violent son l’emergéncia de Daech en Iraq e en Siria, en concurréncia amb l’istoric Al Qaida e AQMI, sa branca al Maugrèb. Aqueles movements recrutan tot un fum de joves musulmans en mal d’identitat dins nòstras banlègas e los entraïnan a cometre d’atemptats en çò nòstre. Menan una guèrra vertadièra contra la democracia e los drechs de l’òme. Solide, totas las autoritats musulmanas de l’Estat francés an condemnat las execucions d’ièr mas lor aparten de castigar los imams que presican l’òdi dins d’unas mosquèas coma aparten a tots los musulmans de se mobilizar mai energicament que o an fach fins ara en davalant per carrièras per denonciar aqueles assassins que balhan un plan trist imatge de lor religion e afiscan l’intolérancia.

Los jornalistas de Charlie Hebdo, en bons tenents de França una e indivisibla, an totjorn caricaturat d’un biais mespresant los regionalistas, autonomistas e independentistas occitans, còrses, bascs, bretons etc. Mas lo Partit de la Nacion Occitana que preconiza l’independéncia, la patz e l’amistat entre totas las nacions de la tèrra definidas segon de basas lingüisticas respècta la libertat de la premsa e d’opinion e vòl rendre omenatge a aqueles jornalistas que partejava pas sovent lors idèas e a totas las autras victimas. Sostènem sens restriccion lo drech de caricaturar quitament se de còps se practica d’un biais otrancièr.

Pasmens, lo Partit de la Nacion Occitana refusa la coësion nacionala e lo recampament preconizats per François Hollande. Perqué nos recampariam darrièr un Estat que nos reconeis pas lo drech mai elementari d’existir e de decidir en Occitània e nos impausa un faiçonatge novèl de las regions occitanas, de còps que i a aberrant, sens cap de concertacion ? Nosautres dont la civilizacion exalta lo « Paratge », es a dire l’egalitat entre los èstres umans, preferissem mandar la man a totes aqueles desrasigats en Occitània que son en mal d’identitat. Que siàn nascuts aici o endacòm mai, an mai a far que non pas de se marcar al FN o partir en Siria o assassinar d’innocents sus nòstra tèrra. Avèm a lor ofrir l’identitat occitana e las valors de libertat e de tolerància de nòstra civilizacion.

Partit de la Nacion Occitana

8 de genièr de 2015