Overblog Suivre ce blog
Editer l'article Administration Créer mon blog

                           SOSCADISSAS  SUS  LO  LUGARN  n° 110

Veni d’acabar la lectura dau Lugarn n° 110. Coma d’acostumada, n’ai preat lo contengut e la sabentura dei divèrs autors que son intervenguts.

Tot bèu primier, demandi a-n-aquelu que m’an legit sus lo sèti de Bèucaire, de mi desencusar per li decas de picadas, e n’i a, qu’ai laissat dins l’article, maudespièch de l’aver tornat legir, de tot segur pas sufisentament.

L’article de G.Labouysse, m’a particularament interessat ( tant coma lo sieu obratge : Histoire de France l’IMPOSTURE ) dins l’analisi que fa dei premícias que menèron au chapladís monstrós, nomenat La Grande Guerre, dich ensin marca ben, e justifica lu òrres insofribles que fuguèron lo quotidian dei paures mesquins que patissían dins la pauta dei trencadas, au mitan dei garris que li venían rosegar lu pens dau temps qu’assajàvan de durmir, e parli pas de la verpor, dei peolhs, dei degalhs de l’artilharia enemiga, dei cargas murtrieri a la baioneta e autri agradanças d’aquela mena que durèron quatre annadas.

G.Labouysse escriu que J.Ferry endralhèt una ofensiva coloniala granda, cen qu’agradava gaire ai autri poténcias europenqui. Ajustarai qu’aqueli poténcias, non fuguèron li darrieri de s’abrivar sus lu territòris d’Àfrica e d’Àsia per assegurar li sieu pretensions a l’encòup estrategiqui e economiqui. Lo tot serà validat, afortit, sagelat per lo tractat de Berlin en lo 1884, sensa demandar lo consentiment dei futurs colonizats, aqueu va solet !

Tocant l’assassinat de l’arquiduc Francés-Ferrand lo 28 de junh a Sarajevo, una emission recenta donada a la TV, precisa que lo governament sèrbe si dubitava de quauqua ren e prevenguèt li autoritas austriaqui dau perilh qu’aquela vesita podia entirar per l’eretier de la corona, e que per consequéncia, valia melhor ne remandar la data. Per autre, sabèm qu’una brava imprudéncia fuguèt de contunhar aquela visita, sobretot après un primier atemptat mancat ! Si porria esquasi pensar que tot fuguèt engimbrat per provocar l’eveniment.

Per quant a la « victòria » finala, inutil de remembrar, pensi, que sensa l’arribada dei Yankees en lo 1917, e la sieu participacion a l’ofensiva dau 1918, l’aligança francò-britannica auria jamai capitat de véncer. Embe un million tres cents cinquanta mila moarts per lu Francés, mai de nòu cents mila per lu Anglés, la coalicion èra pervenguda a la tècola. Una començada de revòlta dins l’armada francimanda que naissèt dins lo mitan dei « pelós » au moment de la batèsta dau Camin dei Dònas, enrabiats de si vèire mandar de contunha a l’assaut dei linhas alemandas sensa minga resulta, laissa pensar que lu aligats desarestats avían perdut la guèrra.

L’article d’E.Roulet m’a laissat per contra, un pauc pensatiu. Vorrii saupre cu a decretat que parlam pas una lenga comuna ? Si diria en legissent aqueli regas que l’existéncia de dialèctes presentesse una mena de termiera irrescompassabla. Coma si soana aqueu qu’auria dich qu’un Gascon non podia parlar lo sieu pròpri parlar ? Per ieu son d’afortiments foara de prepaus, e sieu en acordança  embe li respoastas de sòcis dau PNO.

Òsca per l’article de B.Fruchier qu’abòrda un tèma, aqueu de l’economia, pas talament discutit au PNO, Bernart a rason de lo sotalinhar. Prepausa d’idèas que s’amerítan d’èstre desvolopadi. L’economia es un relarg indefugible, Occitània li pòu pas escapar.

Poadi pas citar lo tot dei autres articles de tria d’aqueu n°110 dau Lugarn, mas son toi meritòris, e ai pas forçadament li conoissenças vougudi per li ajustar un comentari.

Amistats.

Reinat Matelo

SOSCADISSAS  SUS  LO  LUGARN  n° 110

SOSCADISSAS SUS LO LUGARN n° 110

Tag(s) : #Tot en Oc, #Lo Lugarn