Overblog Suivre ce blog
Editer l'article Administration Créer mon blog

Municipalas 2014.

La lista Alternativa L'Isla-de-Baish qu'ei ara completa e serà lèu publicada dins la premsa locala. S'agis d'ua lista "Bastir! - Municipalas 2014", per'mor que mantunas personas presentas dins aquesta lista an signat la carta d'engatjament deus candidats Bastir. Cau saber que dincas a l'ora d'ara, sonque le cap de lista, le Joan-Luc Davezac, èra declarat signatari. Ara que la lista es complèta (29 sòcis), podèm desvelar qu'i son nombroses d'aver aderit a "Bastir!".

En mès de "Bastir!", aquesta lista ei sostenguda per d'ecologistas, per CAP 21, le partit de l'anciana ministra de l'environament, la Corinne Lepage, e sustot per l'Amassada Ecò-Ciutadana 32, que la Melània Borgés, presenta en bona plaça sus la lista, n'ei la co-fondatriça (dambe l'Alexis Boudaud), Melània Borgés qu'èra desjà signatari de "Bastir!" e qu'es ara tanben dins le CAP 21.

Quitament se serà oficialament inaugarada sonque le dissabte 15 de març de maitin, dempus le dissabte 8 de març, le locau de campanha d'Alternativa L'Isla-de-Baish qu'ei d'ara enlà dubèrt au bèth miei de la ciutat, au 13 de l'avenguda deu Comandant Parisòt, dambe la bandièra occitana au dessus de la pòrta (atau le podètz pas mancar : la bandièra se ved de luenh, dempus le cap de l'avenguda !) e coma de costuma, les sòcis de la lista hasquèren en parallèle le dissabte 8 de març ua brava distribucion de papieròts "Bastir!" bilingues (occitan-francés) capvath le mercat setmanièr.

Alavètz, segon le resultat electorau, i aurà autan d'elegit "Bastir!" que de conselhèrs municipaus gessits d'aquesta lista (tanben, 15 son en liça entà la Comunitat de Comuna "Gasconha Tolosana"), per'mor que totes les prumères de la lista son, de fèit, signataris "Bastir!"... D'aqueste biais, qu'ei quauqu'arren d'unic e d'inedit, permor que se l'idea de "Bastir" èra de prumèr de presentar ua o quauques personas dins ua lista "tradicionala" (esquèrra o dreta, sonque : hòra de l'extèma-dreta !), e be fin finala, avèm ací tota ua lista "occitanista" ! e qu'ensaja de's presentar a l'encòp contra la lista d'esquèrra sortenta, e tanben contra la lista "sostenguda per Jean-François Copé", doncas de dreta, quitament se le cap de lista "ei pas encartat enlòc" (enfin, se cau pas velar la fàcia tanpauc !).

Veiram plan coma tot aquò se va debanar, saben plan qu'ua lista "occitanista" (sostenguda per d'ecologistas) a pauc de chança de's trobar plaça au bèth miei deu tradicionau clivatge dreta / gaucha de la politica Francesa... Mès qui sap ? l'avénguer nos ac dirà, arren es pas jamès ganhat per avança.

Municipalas 2014, lista Alternativa L'Isla-de-Baish

Municipalas 2014, lista Alternativa L'Isla-de-Baish

Tag(s) : #Bastir !, #Tot en Oc