Overblog Suivre ce blog
Editer l'article Administration Créer mon blog

Sant Sulpici la punta lo : 15 de novembre de 2014

Partit de la Nacion Occitana

Comitat albigés

47, avenguda Charles de Gaulle

81370 Sant Sulpici la Punta

Comunicat de premsa N° 1213

Omenatge a las victimas de l'imperialisme francés

  L'onze de novembre passat, Iniciativa per Occitània, laboratòri politic e social occitan, organizava a Aniana, en Lengadòc-Bas, una ceremonia en onor dels nombroses Occitans que moriguèron a causa de la guèrra de 1914-1918. Guèrra que l'imperialisame francés ne foguèt a l'origina en causa de sa volontat criminala de dominacion sus Alsaciá.

 Una ceremonia digna e solemna se debanèt davant lo monument als mòrts de la vila d'Aniana. Se la ciutat de l'escrivan Max Roqueta foguèt causida es perqué aquela vila possedís un monument als mòrts que pòrta una bèla profession de fe pacifista, gravada en lenga occitana:

La guèrra qu’an vougut

es la guèrra a la guèrra,

son mòrts per nòstra tèrra

e per tota la Tèrra.”

  Lo Partit de la Nacion Occitana aderís completament a n'aqueste messatge pacifista, nacionalista e universalista. Un tèxte que fa lo ligam entre la memòria de las victimas de l'imperialisme francés, l’amor de la nacion occitana e la solidaritat devèrs l’Umanitat tota.

  Ongan, un vintenat de personas se recampèron davant aquesta lausa clavelada sul monument als mòrts. Lo monde èra vengut d'un pauc de pertot en Occitània. S'i trabava de Provençals, de Lengadocians, mas tanben qualques Gascons. Lo despaus de garba foguèt seguit d'un discors esmovent prononciat per Danièl-Joan Barceló. Per clavar la ceremonia, los participants cantèron l'imne nacional, lo "Se canta".

  Èra lo primièr còp que lo moviment nacional occitan preniá una iniciativa per contracarrar la fèbra chauvinista franchimanda. Temperatura, qu'en aquesta annada 2014 de commemorasons, mancarà pas de pujar fins al deliri. Ja l'isteria a començat abans ora!

  Lo pòble occitan deu contunhar de se mobilisar contra l'escòrna tricolorista facha als aujòls cada onze de novembre. Cadun sap qu'es a partir del chaple de 1914-1918 que l'aparelh d'Estat francés se renfortiguèt e que l'ideologia assimilassionista s'impausèt als pòbles someses de fòrça. Tantas causas que pèrdem de vista e qu'acceptarem pas jamai. Atanben podem pas demorar sens reagir a las demonstracions ostentatòrias del nacionalisme francés sus la tèrra nòstra. Es la rason per la quala, tre ara, lo Partit de la Nacion Occitana convida los Occitans a reténer ja la data del onze de novembre de 2014 per se retrobar, aqueste còp mai nombroses, a Aniana.

Tag(s) : #Tot en Oc, #Comitat Albigés